Sommernachtstraum Beitrag

Sommernachtstraum

Kategorie: LKR Bamberg, LKR Bayreuth, LKR Coburg, LKR Forchheim, LKR Hof, LKR Kronach, LKR Kulmbach, LKR Lichtenfels, LKR Wunsiedel, Regierungsbezirk Oberfranken

Ferienzeit und Sommernächte warn unsrer Kindheit schönste Feste. Wenn´s vorn Aomdessn haouts ghaasn dann, heit kumma merr draußn nuch e wäng zamm.

Zenn Fangheit und Versteckn spilln
und mancher Unfug wurd´ getrejm.
In di Koornpuppm semmer gekrochn nei
und verr Freid nuch kupft in di Scheberla Hei.

Ejch fräjch mei Mutter: „Däff ich heint,
länger draußn bleim? Miß nit ball rei.“
„Dou waßt ja wenn´s Gebäjt tut leitn –
und dess iss ne Summer nit bezeitn.“


„Bluus heint e moll; weils iss su schee!
Di Annern braung aa nit nei geh,“
haou ich gebettlt und haou gfleht;
dess wär für mejch halt aa moll schee.

„Meint wäjng“! saggt sa, „bis finster wärd,
dou waßt, sinst wärd di Tiir zougschperrt.“
Dess war e Wort – dess war e Freid,
mit di Annern draußn bleim – moll heint.

Dr Abendstern stand scho am Himml,
aanzelna Glühwärmla hamm grej gflimmert.
Am Firmament war scho ze sääng
dess Mondes Sichl als „Z“ aufgeh.

Di Nacht su lau – e Ejgl schlich –
Laute grunzend durch´s Gebüsch.
Ess „Gebäjt Leitn“ war scho längst verklunga
und draußn warn sa nuch – di Gunga.

Ess nächtlicha Spell – dr Kinnerspaß –
und ejch ess Neigeh ganz vergaß.
Schnell renn ich haam – di Tiir war zou –
jetzt musst ich störn, di nächtlicha Rouh!

Ejch haou verr Angst an dr Tiir geklopft,
dass merr Aans aufmacht, sehnlichst ghofft –
af aa moll hör ich – wej woss knärrt
und verr inna wärd di Tiir aufgschpärrt.

Jetzt haou ich kriggt mein Schandaspuut –
und mei Vatter haout mit Schelln gedruuht.
Su war dess halt ze unnera Zeit, für di Kinner –
wenn ich zerück denk – und wej iss dess heit?

Heint senn di Kinner nachts im Haus
und dräja gekonnt ne Fernseher auf,
laousn sich beriesln und sej schaun
drhaam der Kinner Sommertraum.

Woss einst für uns – war e „Sommernachtstraum“ –
ist heit ja bluus nuch billiger Schaum.
Di laua Nächt – ess Kinnerspell –
war reina Wahrett – dess vergisst merr niet!

von Buckenreuther Literaten Christa Buchta

---